Dikgoro tša mmušo di kopana go phološa Pilgrims Rest

By: De-Shark

Pilgrims Rest, ka tlase ga Mmasepala wa Selegae wa Thaba Chweu, e tsebalega lefase kabo phara ka dithaba tše botse tša go goka baeti ba mafase a kantle. Pilgrims Rest e tsebega gape ka meepo ya gauta. Eupša, badudi ba motse ba lebane le kgatelelo e boima kudu ya go akaretša dikgohlano ka malapeng, tšhomišo e mpe ya diokobatši, ga mmogo le baithuti ba go tlogela sekolo.

Ka la 7 Diphalane 2026, Kgoro ya Tlhabollo ya Leago (Department of Social Development/DSD), mmogo le Kgoro ya Maphelo, Maphodisa a Afrika Borwa, go akaretša le badudi ba ba tshwenyegilego, ba etetše malapa ka maekemišetšo ago theeletša mathata ao a aparetšego naga.

Go ya ka DSD, lesolo lago tsena ntlo-le-ntlo le utullotše, ka kakaretšo, mathata ao setšhaba se lebanego le ona, gomme gwa bonagala tlhoko ya potlako ya kgokaganyo ya tšhireletšo le thušo.

DSD ere go ile gwa utollwa ditiragalo tše di tšhabišago tša badudi bao ba šomišago dinotagi ka tsela ye e sego ya maleba esale mesong, pele malapa a ka ja le ge e le dijo. Go utullotšwe gape gore basadi ba Pilgrims Rest ba hlokofatšwa ka sephiring, gomme megokgo ya bona e tanywa ke letšhogo. Mathata a go tlogela sekolo, tšhomišo ya diokobatši, le tlaišo ya basadi, di tšewa bjalo ka dika tša go laetša gore ga go kgoro ya mmušo e tee ye e ka kgonago go rarolla mathata a e nnoši.

DSD e boletše gore ye nngwe ya diphihlelelo tše dikgolo tša letšatši ke poledišano le mosetsana yo monnyane setšhabeng sa Pilgrims Rest, yo a tlogetšego sekolo gomme a latela tsela e boima ya tšhomišo ya diokobatši. 

Mosetsana o hlalositše gore o be a šomiša diokobatši pele a tlogela sekolo, e fela o bontšhitše maikemišetšo a gagwe a go nyaka thušo. DSD e kgonthišitše gore mošumi wa leago o tla thuša mosetsana ka ditsela tše di hlokegago gore a hwetše tšhireletšo le thušo ya maleba.

Go ya ka DSD, go nyakega matsapa a kopano ya 

dikgoro tša mmušo tša go fapafapana, le mekgatlo ya baagi ya go fapafapana, go netefatša gore Pilgrim's Rest e dula e le lefelo leo malapa a sa phologeng fela, eupša a thekgwago. Ka lebaka leo, Kgoro e biletša pele kgokaganyo e tiisitšego ya batho kamoka go netefatša gore batho ba ba lego kotsing le malapa a bona ba amogela thušo e feletšego.